أنا ياريّــس من غرقى السفينة السلام- 98 --- بارسل إليك يا ريس
بالرسالة دي عشان أشكرك على زيارتك السريعة للناجين
والمصابين ويمكن يا ريس أنت كنت أسرع من فرق الإنقاذ... طبعا
مش انت رئيس البلد وعندك طيارات وسيارات سريعة..... انا قلت
أكتبلك الرسالة دي اشكرك واقف جنبك وادعمك لأني شايف
وسامع جماعة من المغرضين الشيوعيين او الشيعيين مش عارف
الموضة ايه دلوقتي ...اه اسف الارهابيين بيقولوا انك السبب في
غرق السفينة طبعا ده كلام مش مظبوط لأننا احنا الغرقى السبب
***
احنا اللي حجزنا في السفينة واحنا كمان اللي سافرنا واخدنا
اهالينا وسيبنا البلد عشان قال ايه نحسن دخلنا ونجيب التلفزيون
ابو بوصات كتير ونهرب من الاكل اللي بيجيب سرطانات والدواء
المغشوش وأغذية الأطفال الملوثة,, قال هربنا من ده كله ولما ركبنا
السفينة وغرقت قالوا انت السبب , طيب والريس ماله ليه
الارهابيين الشيوعيين بيقولوا الريس هو السبب! طيب انت يعني
اللي كنت بتسوق السفينة؟ انت اللي طنشت في الانقاذ؟ طيب
انت اللي ما بتعرفش تعوم؟ ياريس سيبك منهم كل دول اهدافهم
واضحة
وعشان أأكد لك كلامي واسد بقهم..... كانت جنبي ام
وابنها حدفهم الموج من على ظهر السفينة والواد ابنها كان ماسك
برميل او حاجة زي كده مش فاكر والام فضلت تعيّط عليه خايفة انه
يقع والواد قالها بعد 30 ساعة تقريبا مش قادر ياماما استحمل
بصراحة ياريس مقدرتش استحمل فضلت انا كمان أعيّـط,, الواد
غرق قدام امه وقدامنا معرفناش نعمله حاجة... وساب ايده
وغرق... مات ياريس
صحيح الريس ماله وليه بيقولوا انه السبب
الام هي السبب والواد ليه متعلمش السباحة مش عمر بن
الخطاب رضي الله عنه قال "علموا اولادكم السباحة...." طيب
حتى لو الواد كان بيعرف السباحة مش لازم يعرف انه مادام
مصري اكيد في يوم حيركب طيارة مصرية أو سفينة مصرية وانه
ممكن يتعلق شهور او سنين بدون استجابة , ليه كل حاجة
بيرموها عليك ياريس طيب عارف انا اللي خلاني اكتبلك الرسالة
دي اني كنت مبسوط قوي وبفتخر قدام نفسي ان الريس زار
الناجين قبل ما يروح يحضر تدريب المنتخب
اول مرة احس اني اعز عندك من الأستاذ حسام حسن والاستاذ
ميدو والباشمهندس أحمد عيد عبد الملك
والله ياريس بيظلموك كتير
انا كنت فاكر اننا غلابة وعايشين على الهامش ومش مهتم بينا
***
عارف الواد الزناتي ده ساكن في البيت اللي في ريحنا في البلد
الواد ده من صغره بيقولوا عليه انه لمض وبتاع فلسفة وبيتكلم في
السياسة كتير وبيشوف الجزيرة ... كان عنده قميص قطن بيتعايق
بيه في كل مناسبة مصنوع من القطن المصري ومغزول في
شركة من شركات المحلة قال ايه صحى الصبح ملقاش القميص
عارف ياريس قال ايه في البلد؟ قال ان الريس باعه زي ما باع
القطاع العام انا طبعا مسكتش وعلى قد فهمي قلتله مش ممكن
ن
يمكن يا واد يا زناتي باعه لابنه الباشا علاء يعني في بيتها...الريس
عارف مصلحتنا ومصلحة البلد حتى لو باع القطاعين مش مشكلة
المهم ربنا يديله الصحة ويدي الباشا جمال والباشا علاء اولاده
الصحة وطولة العمر وكمان الباشا الصغير محمد علاء..... على
فكرة ياريس انا عندي اقتراح ايه رايك نعمل وزارة للباشا الصغير
محمد علاء تهتم بشؤن الاطفال ومشاكلهم وتعينه وزير ويكون
مسئؤل علي كل قنوات سبيس توووون ونربي الجيل الجديد علي
أسس سليمة علمية
والله ياريس انا حاسس بيك وبالهموم اللي انت شايلها علي
اكتافك والناس اللي بتهاجمك دول جهلة مش عارفين حاجة
***
طيب لما السفينة غرقت كان لازم تغرق ليلة الجمعة وانت عارف
اهمية الليلة دي ايه عندنا يمكن اللي قاعد يستقبل الاستغاثة كان
لمؤاخذة نايم او مزوغ, طيب ذنبك انت ايه ؟انت اللي حتسيب
الرئاسة وتقعد بداله . طيب هو في حد قال للسفينة تغرق ليلة
الجمعة
***
وانا قبل ما اغرق يا ريس شفت مشاهد كتيرة قوي ياريس كان
جنبينا بنتين وامهم ماسكين في ايد بعض زي ما يكونوا اتفقوا
على انهم يا امّا يعيشوا سوا او يموتوا سوا
البنتين كانوا لابسين سترات نجاة طبعا هلكانة مش مهم والام
من غير وفضلوا ماسكين في ايد بعض ساعات يعني قول اكتر من
يومين وطبعا محدش جه
الام غطست تحت المية وماقبتش فضلوا البنات يبكوا ويدعوا عليك
وعلى اليوم اللي ربنا بلانا بيك وان البلد رايحة للكوارث
والبنت الصغيرة لمضة زي الواد الزناتي فضلت تتفلسف وتتكلم
وتشتم فيك ...ياريس اصلنا كنا في البحر ساعات ومحدش بيعبرنا
قالوا ايه الاحسن نتكلم في السياسة وفيك , قال ايه البلد
بلد عائلات دلوقتي طيب وماله مش احسن متكون قبايل
***
ولما امهم وقعت وغرقت قالوا الريس السبب طيب ياجماعة ليه
هو الريس كان قالهم ما يعلموش امهم السباحة؟ والام اللي كانت
شايلة بنتها الرضيعة في المية ولان الموج كان عالي البنت
الرضيعة شربت مية وازرقت والموج حدفها بعيد ودلوقتي قال ايه
امها بتقول عايزة من الريس يرجع ليها بنتها... طيب ماله الريس هو
كان قالها تشرب مية مش كان لازم امها تدربها ومتشربش مية
البحر وتشرب مية معدنية
على فكرة ياريس هو بسلامته صاحب السفينة صديق للباشا علاء
والباشا جمال؟ اصل الواد الارهابي الزناتي بيقول... انا اسف يا
ريس.... بيقول ان الباشا علاء مشارك في السفينة صحيح دي
تجارة والباشا علاء ممكن يشارك في كل حاجة في البلد عارف
ياريس لما عرفت كده بقيت اقفل أوضـة نومي احسن الباشا علاء
يشاركني كمان في مراتـي,, معلش ياريس انا بحبك اه بس لغاية
كده ومعرفكش بس انا واثق ان دي اشاعات بتاعة الواد الزناتي
الارهابي الشيوعي اللمض
كمان الواد الزناتي بيقولي ان الريس تبرع بثلاثة مليون جنيه من
كمان الواد الزناتي بيقولي ان الريس تبرع بثلاثة مليون جنيه من
ماله الخاص للبشمهندسين بتوع الكورة ومعاهم الاستاذ حسن
شحاته وبيضرب اسفين قال ايه انه اتبرع من فلوس المحافظة
بمبلغ 15 الف جنيه للناجي وضعفه للغريق
طبعا له كل الحق ناس فرحت الملايين وناس زعلتهم هل يتساووا
في التقدير؟ على فكرة يا ريس متخفش ايوة انا حاسس بيك بتفكر
ان الباشا بوش ممكن يطلب لجنة دولية للتحقيق اصله لو عمل
كده حتكون ملايين اللجان الدولية حتتشكل
متخفش طيب لما الطيارة المصرية اللي وقعت سنة 1999 كان
في لجنة ؟ ولا لما ماتوا 30 شاب واستاذ في مسرح بني سويف
علي فكرة ياريس مين كان السبب .....لمؤاخذة مش قصدي
احرجك ....اسف ياريس اني فكرتك
اقولك على مفاجأة عارف سبب موت الناس في السفينة مش
الغرق ابدا ياريس دول ماتوا بسبب انفلونزا السمك
***
واخيرا ياريس بهديك سلامي وتحياتي ودعائي لك وللبشوات
اولادك واولاد اولادك والدكتور الاستاذ الوزير المحافظ ...محافظ
البحر الاحمر وقريبا حيكون في البحر الابيض.. ومدير الامن العام
والخاص ومدير امن التشريفات وسيادة العميد وابن اخوه وسيادة
العقيد مدير ادارة الغرق وسيادة المقدم الراحل رئيس فرقة الانقاذ
النهري والبحري والرائد المستقيل معاون فرقة الانقاذ السريع
وكل الذين شرفونا بمرافقك يا سيادة الرئيس
وربنا يديك طول العمر ويقصف عمر الغلابة
ويجعله عـــامر
No comments:
Post a Comment