سمعنى احلى سلام ...للشفافية

نشرت جريدة اليكترونية اليوم ان الساعد الايمن والمرافق الشخصي لهشام طلعت مصطفى في باريس اسمه امين السكري وهو ابن عم قاتل سوزان تميم محسن منير السكري ... ويقوم امين السكري الذي يحمل الجنسية الفرنسية على مرافقة وخدمة هشام طلعت مصطفى كلما القى رحاله في باريس .. كما علمت ان تداخل شيوخ النفط في حكاية سوزان تميم لا يقتصر على تأثيرات محمد العبار والشيخ نهيان بن زايدوانما يمتد الى الطرف القطري في القضية .. وللعلم فقط فان امين السكري مرافق هشام طلعت مصطفى هو ابن اخت بشير قنديل السكرتير الخاص للشيخ حمد بن جاسم رئيس الوزراء القطري وصاحب محطة الجزيرة وقد يكون هذا وراء تكتم الجزيرة عن حكاية سوزان تميم واذا اردت ان تكحل عينيك برؤية امين السكري توقف برهة في بار فندق ريتز في باريس فهو شبه مقيم في البار

ولكن اين الرابط السعودي في هذه العلاقة المتشابكة ؟ ... الرابط تجده في فؤاد خربوطلي السائق الشخصي للامير محمد الفيصل ( ابن بنت الامير سلطان ولي العهد ) ... فبعد طرد خربوطلي من خدمة الامير التحق بحاشية هشام طلعت مصطفى ... واذا اردتم المزيد من هذه التفاصيل المتداخلة عن علاقات الامراء والشيوخ بهذه النوعية من الاشخاص في باريس اسالوا محمد جهام الكواري سفير قطر في فرنسا .... فعنده الخبر اليقين

ا

منتهى الشفافية والعلوقية كمان

واحد رجل اعمال بيحب واحد فنانة عربية ومغرم بيها هوة حر...يقوم يعرف انها بتعرف واحد تانى رجل اعمل هية حرة...فالاولانى يبعت ناس تقتلها....ماشى ومالة...قوم يطلع جوزها ويرفع قضية ويتهمها بانها وصديقها اولانى عاوزين يقتلوة...هما احرار...رجل الاعمال دة تطلع اشاعة تقول انة هرب وخايف من المسائلة....عادى ما كلهم بيهربوا....والتحقيقات تقول ان القاتل ظابط شرطة متقاعد...مايضرش.....لغاية دلوقتى احنا بنتكلم فى قضية فساد اخلاقى وانهيار بعض رجال الاعمال امام الشهوة... ودى مشكلتهم هما.....اما مشكلتى انا بقة ان دين ام البورصة تتاثر وممكن ان تنهار علشان الشخص دة....طب سمعنى احلى سلام للبورصة وكمان سلام للبورصة....لما بورصة بلد كاملة ممكن تنهار علشان رجل اعمال يبقى سمعنى احلى سلام على طول السلام لرجال الاعمال....وبيقولك ان رجل الاعمال دة ادى القتيلة خمسة ملايين دولار وادى الراجل اللى قتلها مليون دولار يعنى من الاخر وبحسبة بسيطة الراجل صرف خمسة وعشرين مليون جنية علشان النسوان...طيب الفلوس دى جابها منين...وهوة عامل قروض من البنوك علشان مشاريعة الاستثمارية...واصلا الارض هوة اخدها من الدولة ببلاش كدة....واللى حصل ان الجريدة اللى كتبت فى الموضوع دة اتصادرت فى نفس اليوم واللى حصل كمان ان النائب العام اصدر قرار بعدم النشر فى الموضوع دة ... طب لية ...اكيد لعدم الاضرار بالاقتصاد العام...معروفة دى....منتهى الشفافية.... بصوا انا حاكتب شوية اسامى وكلمات جنب بعضها وانتوا رابوها واطلعوا بالنتيجة النهائية وتصبحوا على ...مش قادر اقول على خير....سلام
شرطة..سوزى...بورصة ..طلعت ...متقاعد ...مصطفى ...تميم ... مدينتى ....هشام ... قاتل... دبح....ملايين ...قروض ...النائب ...ارض...سفالة

وطن بائس...زمان بخيل...شعب تنح

الوطن العربى يحتضر ويفقد رجالاتة المخلصين يوما بعد يوم...وقطار الموت قد جاء مسرعا ينتقى الشرفاء فى هذا الوطن البائس...بالامس القريب فقدنا الدكتور المسيرى ثم المبدع يوسف شاهين و ابراهيم شكرى واخيرا محمود درويش..... لقد ابى هذا الزمان البخيل ان يترك لنا اناس تاثروا واثروا فينا وكان الوطن وهمومة اول اهتمامتهم...لست معترضا على ارادة الله فالله الحمد وكلنا للة عبد يفعل بنا ما يشاء....ولاكنى ادركت ان الموت يختار وينتقى الشرفاء...ولا اخفى عليكم قلقى وخوفى على الاخرين الذين مازالو بيننا....كم اتمنى ان يدرك قطار الموت كم نحن بحاجة الى هؤلاء الاناس ليصحوا فينا العزة والكرامة وكم نحن بحاجة الى ان ياخذ الموت اناسا اخرون لطالما عبثوا باقدارنا....لقد دمروا كل شئ ولا عزاء للرجال....ان وجدوا

يا ترحمونى يا تقتلونى ...والله قلبى اتوجع

أنا مصرى أبن مصرى وليا الشرف
برغم المهانة برغـــــــــــــــم القرف
برغم الزبالة اللى مالية الشــــــوارع
برغم الفســـــــــــاد اللى بيه اعترف
سمو معـــــــــــــــالى رئيس الوزارة
نتيجة موظف بسيـــــــــــــط انحرف
برغم المجاعة اللى داخلين عليهــــــا
وفينا اللى عـــــــايش حياته فى ترف
برغم البطــــــــالة فى أوضة وصالة
برغم أن أخر جنيـــــــــــــه اتصرف

برغم طـــــــــــابور الصباح السخيف
وكل منايا يادوب كــــــــــــــام رغيف
برغم أسايـــــــــا لمنظر عشايـــــــــــا
وأقول مش مهم يــــــــــا واد نام خفيف
برغم إنى شايف بــــــــــلاوى وساكت
وعايش مطنش كــــــــــــــــ... كفيف
برغم وزارة رئيسهــــــــــــ... حرامي
وشوفوا البجاحـــــــــــــة يقولوا نظيف
برغم الســـــــــــلام اللى غرقت بناسها
برغم العيـــــــال اللى ساكنة الرصيف

برغم حكومة شعـــــــــــــارها الكلام
ورغم رئيسنــــــــــــ... عليه السلام
ورغم أن كله يــــــــــــــا عالم بيغلى
إلا كرامتى بترخص قــــــــــــــــ...
برغــــــم إنى عايش في بلدى فريسة
ووجبة شهية لبعض اللئـــــــــــــ...
برغم أن كـــــــــــــل تاريخك يا بلدى
فى عهد جنابه كـــــــــــــلام فوق رخام
برغم ده كله يــــــــــــا مصر بحبك
وطظ فيهم ودا آخر كلام

شاعرنا المناضل محمود درويش فى ذمة الله

اسرة المدونة تنعى بالحزن والاسى رحيل الشاعر والناضل العربى محمود درويش ونتذكر وسنظل نتذكر محمود درويش باعذب الكلمات وها هى بعض من شعرة الذى ما زال فى ذاكرتى منذ الطفولة....فوداعا محمود درويش
أحنُّ إلى خبز أُمي

وقهوة أمي

ولمسة أُمي ..

وتكبُر في الطفولةُ

يوماً على صدر يومِ

وأعشَقُ عمرِي لأني

إذا مُتُّ,

أخجل من دمع أُمي !

خذينيِ إذا عدتُ يوماً

وشاحاً لهُدْبِكْ

وغطّي عظامي بعشب

تعمّد من طهر كعبك

وشُدي وثاقي ..

بخصلة شَعر..

بخيطٍ يلوِّح في ذيل ثوبك ..

عساني أصير ُإلهاً

إلهاً أصير..

إذا ما لمستُ قرارة قلبك !

ضعيني , إذا ما رجعتُ

وقوداً بتنور ناركْ ..

وحبل غسيل على سطح دارك

لأني فقدتُ الوقوفَ

بدون صلاة نهارك

هَرِمْتُ فردّي نجوم الطفولة

حتى أُشارك صغار العصافير

درب الرجوع .. لعُش انتظارِك!!

تضامنا مع سعد الدين ابراهيم

احمد عبد الهادى ...مين دة؟؟بيقولوا رئيس حزب شباب مصر؟؟؟شباب مصر هما فين شباب مصر ما كلهم يا برة مصر يا اما بيغرقوا لما بيحاولوا خرجوا برة مصر....المهم اكتشفت انة حزب كرتونى لا فائدة منة يمثل اى شئ على ارض الواقع....الاخ عبد الهادى رافع قضية على سعد الدين ابراهيم وبيطالب باسقاط الجنسية عنة...احا...مين يملك رفع الجنسية عن مواطن مصرى...اكاد اشك بل عنى شبهة يقين ان يكون احمد عبد الهادى قد قراء كتابا واحد او مقال للدكتور سعد الدين ابراهيم او حاول فهم من اى خلفية جاء هذا الرجل....ان ما فعلة سعد الدين انة طالب بربط المعونات الامريكية بالاصلاحات السياسية فى مصر وهذا اعتقد انة مطلباعادل جدا لكل مصرى يريد الاصلاح..اذا كان النظام يتربح من المعونات الخارجية من اجل الاصلاح السياسى فاليفعل هذا الاصلاح ونراة واقعا ملموسا على ارض الواقع ان النظام قد اساء التصرف وحان الوقت لمحاسبتة ....يا احمد عبد الهادى يا دكتور يا رئيس حزب شباب مصر ان من زج بك فى هذا المنحدر كل ما قصدة او قتل حزبك وهو مازال فى الرحم..حاول ان تصلح موقفك ان المصريين ليسوا بهذة السذاجة كى يلتفوا حول هذا الهراء......والمدونة تعلن تضامنها مع الدكتور سعد الدين ابراهيم وننتظر حكم الاستئناف فى الحكم الصادر مؤخرا..فلا داعى ان نتحدث عن الحكم الا بعد الصدور النهائى ليكون الحكم بات..... وتبقى الكلاب كلابا والاسود اسود..... ت

بعطش اليكى واحن واجوع...يا اسكندرية

شارعنا أهدى شارع فى المنطقة و ضلمته بعد تمانية بليل واللمب اللى متصلحتش من بعد ما بطلنا نلعب فيه , عبد الناصر من أول النفق بنزلايته ولحد الأكاديمية العربية , الشجرة اللى قدام بيتنا , إسكندر إبراهيم بالقهاوى بتاعته و الحريم بتاعته برضوه , بالسهر فيه لحد الصبح , بعجيبة اللى ميحلاش عليها الشاى إلا بعد واحدة بليل و الجو رايق وجميل, بزحمة و دوشة المنطقة دى فى الصيف ل أبوربيع و ساندويتشات الفول بالسدق للمصطبة اللى جنب أبو ربيع اللى كنت باكل عليها ل شوارع ميامى الجوانية و التوهان اللذيذ
فيها للنفس اللى تطلب جاتوه إتناشر بليل من عند كلاسيك و تشكيلة شرقى من عند شهد الملكة
تحية من قلبى لكل جامع حاولت أحفظ فيه القرأن ومكملتش للأسف و صلاة العيد فى شرق المدينة و الشارع مردوم ناس بتكبر للأنتعاش اللى بحس بيه و أنا راجع من صلاة الفجر
سلام كبير الصراحة للعب الكورة قبل و بعد المدرسة بالكورة البلاستيك أم نص جنيه لبتوع النشان للناس اللى بطلت تبيع قصب لعصام السحرى و القصص بتاعته والكورة البوليتكس أم تلاتة جنيه و نص لمحلات البلاى إٍستيشن
وبحر ميامى و سيدى بشر للمشوار المبهج و إحنا شايلين الشماسى و رايحين البحر للحفرة اللى بتتعمل لحد ما توصل إيطاليا , لسندويتشات الكفتة و السدق اللى بتتاكل و هى مليانة رمل من كُتر الجوع والجمل المعتادة اللى بتسمعها أول ما تدخل الشط زى البحر حصيرة النهاردة ., البحر فيه سحب , البحر فيه قناديل , الموج عالى النهاردة , المية صافية النهاردة إنت لو وقفت فى المية حتشوف رجليك , المية معفنة النهاردة الله يخرب بيت المصييفين , ماهو يا جماعة قولتلكم عايزين تنزلوا البحر الساعة سبعة الصبح قبل الشمس و الزحمة
سلام لبير مسعود ,و الناس اللى بترمى فيه فلوس و تتمنى أمنية و العيال اللى بتنط فيه و تطلع من الناحية التانية
و الكورة عالرملة و الفرهدة بعد ربع ساعة و راجل يعدى بالكاميرا بيصور الناس , عُمره ما أخدلى صورة
لشارع خليل حمادة لمحطة قطر سيدىبشر و الناس المتدلدلة من القطر الساعة سبعة الصبح لبتاع الجرانين و للمنتزة و أيام الصحة لما الواحد كان بيروح يلعب كورة من سبعة لسبعة للمعمورة اللى حبتها و أنا صغير و كرهتها لما كبرت وحسنى بتاع المشويات اللى عمرى ما حبيته ل فلفلة أجدع بتاع عصير فى إسكندرية و أحلى سودانى باللبن و سلام كبير للعيال اللى بطلوا يلعبوا فى شارعنا بحجة إنهم كبروا على اللعب فى الشارع
لفريق شارعنا للشاب المتطوع اللى بيقف قدام محل خميس علشان الكورة متدخلش عنده و سلام تانى لنفس الشاب اللى بيزهق بعد شوية من الوقفة و يبتدى يقولك نزلنى بدالك جون للناس اللى بتذعقلنا علشان الدوشة و إحنا بنكبر دماغنا و الأمهات اللى بيتنبح حسها فى المنادية على عيالها علشان يطلعوا يتغدوا و إحنا برضوه مكبرين دماغنا و كل واحد عربيته تعطل فى شارعنا و يقولك والنبى زقة يا كابتن ومحطة فيكتوريا الترام و أيام عبد الناصر و بنات ثانوى حدا الله ما بينى و مابينهم و سلسبيل بتاع العصير اللى قضى عليه الدكر بتاع العصير اللى فتح قدامه لمحل الكاسيت اللى بيعمل كوكتيلات غريبة للشارعين اللى بيطلعوا على المشاريع اللى ياما إحتارنا مين فيهم أقصر للناس اللى بتستنى المشروع الكبير اللى بيودى محطة مصر علشان هو بنص جنيه و الصغير اللى ناس مسمياه النينجا و ناس مسمياه التوناية و اللى أجرته واحد جنيه كامل سواء نازل فلمنج نازل المحطة أو إنشاالله حتى تكون نازل أول شارع الأقبال لسواقين المشاريع و هما بيجروا علشان الظابط جاى ل أبو خالد بتاع الفول رفيق أيام الثانوى
و تحية عالية أوى لسور مدرسة عبد الناصر اللى ياما رفعوه علشان التلامذة متزوغش بس برضوه ولادنا قدروا يعدوه , سلام لعبد الناصر برضوه علشان متزعلش , أحمد إسماعيل بتاع الفيزيا و اللى عقدنى فيها لأ لأ لأ
ل خالد إبن الوليد و خد عندك بقى من غير ترتيب سينما المنتزة اللى إتشالت من زمان و لسة إسمها موجود للرصيف اللى متقدرش تحط رجلك عليه فى الصيف لقهاوى خالد إبن الوليد ل أبو شوشة اللى بطلنا نقعد عليها بعد ماحط يافطة مبايعة حسنى مبارك للبيت الكبير و الناس اللى بتهيص كل ما برشلونة يدخل جون و نفس الناس برضوه تهيص لما يدخل فيه جون للدومينو و الطاولة اللى مينفعش تلعب بيهم برة للكوتشينة الممنوعة فى القهاوى فى إسكندرية متعرفش ليه لشارع محمد نجيب أجدع ملقف هوا فى إسكندرية للوسعاية اللى اللى ما بين محمد نجيب و البحر اللى ياما لعبنا فيها كورة و اللى حاطوا فيها حاجات غريبة علشان الناس متعرفش تلعب ل شيش طاووق مؤمن سيدى بشر أكتر محل أكل طلع عليه إشاعات فى الدنيا و المحل اللى فتح جنبه على طول و سمى نفسه مسلم للبحر و الكورنيش بجلالة قدره اللى مينفعش يتنسى و مينفعش يتكتب عنه لبياعين الدرة و اللب و السودانى و الفريسكا لشارع للوران و زيزينيا و سان إستفانو و قصر الصفا الوجه الأرستقراطى لأسكندرية لمول سان إستفانو اللى بقالهم عشر سنين بيبنوا فيه لبوكلى و قهوة الكيخة و عم على اللى مبيخافش من حد و بيزعق فى الكل و خطوط الترام الداخلة فى بعض متعرفش مين بيودى على فين وترام واحد و ترام إتينين اللى طول عمرى بتلغبط بينهم بس أنا فاكر إنى كنت بركب اللى يافططه زرقة علشان كان بيوصل أسرع
و التاكسيات الأصفر ف أسود اللى بيروحوا سيدى بشر بالعافية علشان الطريق زحمة
لكوبرى إستانلى اللى بيتلزق فى أى مسلسل أو فيلم علشان المخرج يقولك شفت علشان تصدقنى لما أقولك إننا بنصور فى إسكندرية
الناس اللى بتيجى تعدى البحر فتلاقى أقرب نفق على بعُد نص كيلو فتتشاهد و تاخده جرى على نفس واحد
و عندك شارع سوريا و شياكته و المعسكر الرومانى بإشارته الواقفة على طول للست اللى بتشحت فيها بالعافية لمكتبة النحلة و تصوير الورق إتنين بليل لسيدى جابر قلب الأسكندرية لسموحة حيث البنات الحلوة و الشباب الروش و الحكاوى القديمة عن سموحة الأرض الخراب اللى التاكسى كان بيخاف يدخلها لزهران قبلة أهل سموحة قبل ما جرين بلازا يفتح و ياكل منه الجو , لجرين بلازا أجمل المولات المفتوحة لكفر عبده و الجملة السخيفة و الضحكة اللزجة من كل غريب عن إسكندرية و هو بيقولك معقول أنضف حتة عندكم فى إسكندرية إسمها كفر عبده
الجزويت و نادى السينما و حفلات الجمعة ,الشاطبى و كلية الهندسة و العياذُ بالله و شارع بورسعيد اللى لازم تزوغ قبل الساعة إتناشر من الكلية علشان تعرف تركب منه و أبو قير و زحمته و دوشته
سلام من القلب لكل شاب ظريف متعرفوش يعرض عليك إنكوا تتشاركوا فى تاكسى بدل الوقفة البطالة دى
لمكتبة إسكندرية اللى ياما روحت فيها حفلات بس ولا مرة جالى نفس أقعد أقرا فيها كتاب
للمجمع النظرى و شبابه اللى بيروحوا يقضوا يوم ظريف
محطة الرمل و سمعنى أحلا سلام لمحطة الرمل و النبى كمان سلام لمحطة الرمل و صفية زغلول و سعد زغلول و الفوضى الخلابة بتاعة محطة الرمل و الناس اللى بتروح محطة الرمل من يمة الكورنيش و الناس اللى تروحها من شارع أبوقير تنزل عند المطافى و تخَرم منها تطلع عند سينما أمير و خدُ عندك بقى سينمات محطة الرمل و مكتبات الرصيف مركز الأبداع و مسرح سيد درويش و قهوة القاهرة و كابتشينو كافيه دى لابيه و الجرسون اللى أقنعنى إن الكابتشينو هو هو النسكافيه و إن دى بس شكليات ,روسترى ,شارع البطالسة لجوتة و الأسبانى و الفرنساوى و الروسى كمان ولأمريكانى اللى عمرى ما دخلته لطلبة الجامعة اللى بيزوغوا بدرى و يروحوا السينما تعظيم سلام كبير أوى ليهم للولاد و البنات اللى مشبكين إيديهم فى إيدين بعض و عايشين الوهم للركنة على السور الحديد أدام سينما أمير مستنين الصالة تفتح للفلاح و كبدته العظيمة للنبى دانيال و البياعين اليامة و الهلال اللى بتقفل حداشر الصبح لمحطة مصر اللى على طول بتوه فيها و نفسى أفهمها و حكاوى أمى عن الحتت اللى مدوستهاش فى إسكندرية زى راغب و غيط العنب و كرموز و كمان المنشية و محلاتهاو اللخبطة وسط الشوارع لنص ساعة مشى لبحرى و قهوة فاروق و صوبية طلعت و ناس كتيرة رايحة و جاية و النسكافيه فى كافيتريا الدايفنج و إنت سرحان فى البحر للقلعة و القعدة الحلوة قدام القلعة و الراجل الوحيد اللى بيبع حلبسة و شوية الهوا الحلوين
سلام كبير لدهب اللى بتستنى الفطيرة بتاعته لمدة ساعة لصواريخ فى بحرى لألبان عليكة الأكتشاف المتأخر جداً لقهوة الهندى اللى مينفعش توصف مكانها لحد للبن البرازيلى قبل التجديدات و بعد التجديدات لخروب أمال بعد كبدة الفلاح سلام كبير أوى لهريسة أحمد حسنين بكل فروعها الراجل اللى عُمره ما زود فى السعر
و أكتوبر و السهر لوش الصبح و الكوتشينة و الصحاب و الناس الغاليين أوى للعجمى حيث البيطاش حيث بيانكى حيث الحريم الجامدة و شقة صاحبنا اللى باعها بلاش
سلام و حنين جامد أوى لفيلم حلو حفلة إتناشر بليل يوم الجمعة فى سينما أمير تطلع منه ياخدك شارع صفية زغلول بالحضن
سلام كبير أوى للمشى فى الشوارع بليل مع الناس اللى بتحبها جنب شريط الترام أو على الكورنيش سلام كبير للأحلام الجميلة والفرقة اللى متعملتش و الأفلام برضوه اللى متعملتش ولا حتى إتكتبت للبنات اللى إتحبت من بعيد ومتقالهاش
سلام كبير للمطرة و إنت بتتفرج عليها من إزاز بيتكم و إنت بتجرى تحتها علشان تتحمى فى مدخل عمارة للشوارع الغرقانة فى شبر مية
سلام من قلبى لكل حاجة نسيت أكتبها غصب عنى مع إنى أكيد مش ناسيها